పంజాబ్​ సీఎం చన్నీ బంధువు ఇంట్లో ఈడీ సోదాలు.. రూ.6 కోట్లు స్వాధీనం

చన్నీ బంధువు ఇంట్లో ఈడీ సోదాలు- రూ.6 కోట్లు స్వాధీనం

అసెంబ్లీ ఎన్నికలు సమీపిస్తున్న వేళ పంజాబ్‌లో ఎన్‌ఫోర్స్‌మెంట్‌ డైరెక్టరేట్‌ సోదాలు కలకలం రేపుతున్నాయి. అక్రమ ఇసుక తవ్వకాల కేసుకు సంబంధించిన వ్యవహారంలో పంజాబ్​ సీఎం చరణ్‌జీత్ సింగ్​ చన్నీ సమీప బంధువు భూపిందర్ సింగ్​కు చెందిన ఇళ్లపై ఈడీ దాడులు జరిపింది. రూ.6 కోట్ల నగదు స్వాధీనం చేసుకుంది. రాష్ట్రంలో అసెంబ్లీ ఎన్నికలకు ముందు ఈ దాడులు ప్రాధాన్యం సంతరించుకున్నాయి. మంగళవారం చన్నీ బంధువు భూపిందర్‌ సింగ్‌ హనీ నివాసంతో పాటు మరో 10 ప్రాంతాల్లో ఈ సోదాలు చేశారు.

ఈ దాడుల్లో రూ.6 కోట్ల నగదును స్వాధీనం చేసుకున్నట్లు ఈడీ అధికారులు తెలిపారు. ఇందులో రూ.4 కోట్లు.. పంజాబ్‌ సీఎం మేనల్లుడికి సంబంధించిన నివాసంలో గుర్తించినట్లు చెప్పారు. చన్నీ మరదలి కుమారుడైన భూపిందర్‌ సింగ్‌ హనీ.. పంజాబ్‌ రియల్టర్స్‌ పేరుతో ఓ సంస్థను నిర్వహిస్తున్నారు. ఈ సంస్థ ద్వారా అక్రమంగా ఇసుక తవ్వకాలు చేపడుతూ కోట్ల కొద్దీ నల్లధనాన్ని ఆర్జిస్తున్నట్లు ఆరోపణలు రావడంతో ఈడీ అధికారులు మనీలాండరింగ్‌ కేసు నమోదు చేశారు. ఈ కేసు దర్యాప్తులో భాగంగానే భూపిందర్ నివాసంతో పాటు కార్యాలయాల్లో అధికారులు సోదాలు చేస్తున్నారు.