ఎలక్ట్రిక్ కార్ల దిగ్గజం టెస్లా, సోషల్ మీడియా ప్లాట్‌ఫామ్ ‘ఎక్స్’ అధిపతి ఎలాన్ మస్క్ ప్రపంచ సంపన్నుడి హోదాను కోల్పోయారు. టెస్లా కంపెనీ షేర్ల విలువ సోమవారం ఏకంగా 7.2 శాతం క్షీణించడంతో ఆయన సంపద విలువ 197.7 బిలియన్ డాలర్లకు తగ్గింది. దీంతో బ్లూమ్‌బర్గ్ బిలియనీర్స్ సూచీలో 200.3 బిలియన్ డాలర్లతో అమెజాన్ వ్యవస్థాపకుడు జెఫ్ బెజోస్ ప్రపంచ నంబర్ 1 కుబేరుడిగా అవతరించారు.
సోమవారం టెస్లా ఇంక్‌లో షేర్లు 7.2% పడిపోయిన తర్వాత బ్లూమ్‌బెర్గ్ బిలియనీర్స్ ఇండెక్స్ లో జెఫ్ బెజోస్‌కు మస్క్ తన స్థానాన్ని కోల్పోయాడు. మస్క్ నికర విలువ ఇప్పుడు $197.7 బిలియన్లు, బెజోస్ సంపద 200.3 బిలియన్ డాలర్లు. గత 9 నెలల వ్యవధిలో ఎలాన్ మస్క్ రెండవ స్థానానికి పడిపోవడం ఇదే తొలిసారి. 2021లో వీరిద్దరి సంపద మధ్య భారీగా 142 బిలియన్ డాలర్ల వ్యత్యాసం ఉంది. అయితే గత కొంతకాలంగా టెస్లా షేర్లు భారీగా క్షీణిస్తుండడం మస్క్ వ్యక్తిగత సంపదను కరిగించివేస్తోంది. 2021లో గరిష్ఠ స్థాయి నుంచి ప్రస్తుతం ఏకంగా 50 శాతం మేర షేర్లు పతనమయ్యాయి. చైనాలోని కంపెనీ ఉత్పత్తి క్రితం ఏడాదితో పోల్చితే భారీగా తగ్గిందనే రిపోర్టులతో టెస్లా షేర్లు సోమవారం భారీగా కుంగాయి.
అమెజాన్ వ్యవస్థాపకుడు జెఫ్ బెజోస్ ప్రపంచ సంపన్నుల జాబితాలో అగ్రస్థానంలో నిలవడం ఇదే తొలిసారి కాదు. 2017లో తొలిసారి మైక్రోసాఫ్ట్ సహ వ్యవస్థాపకుడు బిల్ గేట్స్ ను అధిగమించి నంబర్ 1 స్థానంలో నిలిచారు. అయితే 2021లో టెస్లా షేర్లు క్రమంగా బలపడడంతో మస్క్ సంపద అమాంతం పెరిగిపోయింది. దీంతో బెజోస్ వెనుకబడ్డారు. తిరిగి మళ్లీ ఇప్పుడే అగ్రస్థానాన్ని దక్కించుకున్నారు.
ఇది కూడా చదవండి: రాహుల్ గాంధీ సహా ఎవరు వచ్చినా ఖమ్మంలో ఎదుర్కొంటా
