ఎన్నికల ప్రచారం చేస్తూ అనారోగ్యంతో కాంగ్రెస్ పార్టీ ఎమ్మెల్యే అభ్యర్థి కన్నుమూశాడు. ఈ ఘటన రాజస్థాన్లో జరిగింది. కరణ్‌పూర్ అసెంబ్లీ నియోజకవర్గం నుంచి కాంగ్రెస్ పార్టీ తరఫున గుర్మీత్ సింగ్ కూనర్ (75) పోటీలో ఉన్నారు. ఆయన నవంబర్ 4న తన నామినేషన్ కూడా వేశారు. ఆ తర్వాత ఎన్నికల ప్రచారంలో స్పీడ్ పెంచారు. తాజాగా ఈ నెల 12న ఎన్నికల ప్రచారంలో పాల్గొన్న సమయంలో ఆయన తీవ్ర అస్వస్థతకు గురయ్యాడు. దాంతో వెంటనే ఆయనను ఢిల్లీలోని ఎయిమ్స్ ఆస్పత్రిలో చేర్పించారు. ఆయనను పరిశీలించిన వైద్యులు.. కూనర్కు కిడ్నీ ఇన్ఫెక్షన్ సోకినట్లు గుర్తించారు. అక్కడ చికిత్స పొందుతున్న ఆయన.. ఈ రోజు ఉదయం తుదిశ్వాస విడిచారు.
Read Also: ఐసీసీ ర్యాంకింగ్స్ విడుదల.. వన్డేల్లో నెంబర్ వన్ బ్యాట్మెన్గా శుభమన్ గిల్
రాజస్థాన్లో నవంబర్ 25న పోలింగ్ జరగనుంది. కాగా.. ఓటింగ్కు పది రోజుల ముందు గుర్మీత్ సింగ్ మరణించడంతో ఇప్పుడు ఈ స్థానానికి ఉప ఎన్నిక జరగనుంది. గుర్మీత్ సింగ్ కరణ్‌పూర్ నుండి ప్రస్తుత కాంగ్రెస్ ఎమ్మెల్యే ఉన్నారు. ఆయన 2018 ఎన్నికల్లో సురేంద్రపాల్ సింగ్, పృథివాల్ సింగ్ సంధులను ఓడించి మంత్రి అయ్యారు. ఈసారి కూడా ఈ ముగ్గురు అభ్యర్థులు బరిలో ఉన్నారు.
కాగా.. 200 మంది సభ్యులున్న రాజస్థాన్ అసెంబ్లీకి నవంబర్ 25న 199 స్థానాలకు మాత్రమే ఓటింగ్ జరుగనుంది. ఇలా 199 స్థానాలకు ఓటింగ్ జరగడం మూడోసారి కావడం గమనార్హం. రాజస్థాన్లో 2013, 2018లో కూడా 199 స్థానాలకు మాత్రమే ఓటింగ్ జరిగింది.
