వన్డే ప్రపంచకప్‌లో హ్యాట్రిక్‌ విజయాలతో జోరు మీదున్న టీమ్‌ఇండియా గురువారం పుణె వేదికగా బంగ్లాదేశ్‌తో తలపడనుంది. అన్ని రకాలుగా బంగ్లాదేశ్‌ కన్నా రోహిత్ సేన ఎన్నో రెట్లు మెరుగ్గా ఉన్నా.. రీసెంట్గా జరిగిన ఆసియా కప్ మ్యాచుల్లో మాత్రం బంగ్లా చేతిలో ఓటమి పాలైంది. బంగ్లా జట్టు ఎంత బలంగా తయారైందో దీన్ని బట్టే అర్థం చేసుకోవచ్చు. ఇప్పటికే ప్రపంచ చాంపియన్‌ ఇంగ్లండ్‌పై అఫ్గానిస్థాన్‌.. దక్షిణాఫ్రికాపై నెదర్లాండ్స్‌ గెలిచి రికార్డ్ సృష్టించాయి. ఆ జట్లను స్ఫూర్తిగా తీసుకొని బంగ్లా కూడా భారత్‌ను నిలువరించాలని గట్టి ప్రయత్నాలు చేస్తుంది.
కాగా.. ఇప్పటికే వరల్డ్ కప్లో ఆడిన మూడు మ్యాచుల్లోనూ గెలిచి ఊపు మీదున్న రోహిత్ సేన.. ఈ మ్యాచులోనూ గెలిచి పాయింట్ల పట్టికలో టాప్ ప్లేస్ చేరాలని భావిస్తోంది. తొలి మ్యాచులో ఆస్ట్రేలియాను ఓడించిన రోహిత్ సేన ఆ తర్వాత వరుసగా అఫ్గానిస్థాన్‌, పాకిస్థాన్లను మట్టికరిపించింది. ఆడిన మూడు మ్యాచ్‌ల్లోనూ అలవోక విజయాలు సొంతం చేసుకున్న రోహిత్ సేన నేడు బంగ్లాదేశ్‌తో అమీతుమీ తేల్చుకోనుంది. ఇటీవల బంగ్లాతో ఆడిన నాలుగు మ్యాచ్‌ల్లో మూడింట ఓడిన భారత్.. మరి ఈ సారి ఏం చేస్తుందో చూడాలి. కాగా.. పుణె పిచ్‌ బ్యాటింగ్‌కు సహకరించే అవకాశాలెక్కువ. ఇక్కడ జరిగిన గత ఐదు మ్యాచ్‌ల్లో మూడింట తొలుత బ్యాటింగ్‌ చేసిన జట్లు మూడొందల పైచిలుకు స్కోర్లు చేయడం గమనార్హం.
