రంజాన్ కాల్పుల విరమణపై ఆశలు సన్నగిల్లుతున్న నేపథ్యంలో గత 24 గంటల్లో ఇజ్రాయెల్ జరిపిన దాడుల్లో గాజాలో 67 మంది చనిపోయారు. దీంతో పాలస్తీనాలో జరుగుతున్న యుద్ధంలో ఇప్పటివరకు మరణించిన పాలస్తీనియన్ల సంఖ్య 31,112కు పైగా పెరిగింది. గాజా ఆరోగ్య మంత్రిత్వ శాఖ ఈ సమాచారాన్ని ఇచ్చింది. యుద్ధానికి అంతులేకుండా పోవడంతో గాజాలోని పాలస్తీనియన్లు రంజాన్ మాసం ప్రారంభం సందర్భంగా సోమవారం ఉపవాస దీక్షలు ప్రారంభించారు.
పాలస్తీనాలో ఇజ్రాయెల్ దాడుల కారణంగా మానవతా సంక్షోభం నిరంతరం తీవ్రమవుతోంది. ఇజ్రాయెల్ బందీలు, పాలస్తీనా ఖైదీల మార్పిడి, గాజాకు మానవతా సహాయం అందించడానికి అనుమతించే రంజాన్‌కు ముందు కాల్పుల విరమణ ఒప్పందాన్ని కుదుర్చుకోవాలని యుఎస్, కతార్, ఈజిప్ట్ ఆశించాయి. అయితే ఈ ఒప్పందానికి సంబంధించిన చర్చలు గత వారం నిలిచిపోయాయి. ఇజ్రాయెల్ దాడుల్లో మరణించిన 67 మంది మృతదేహాలను గత 24 గంటల్లో ఆసుపత్రులకు తీసుకురాగా, యుద్ధం ప్రారంభమైనప్పటి నుండి మరణించిన పాలస్తీనియన్ల సంఖ్య 31,112 కంటే ఎక్కువ అని గాజా ఆరోగ్య మంత్రిత్వ శాఖ తెలిపింది. ఎంత మంది పౌరులు మరణించారు. ఎంత మంది యోధులు మరణించారు అనే దాని లెక్కలను మంత్రిత్వ శాఖ ఇవ్వలేదు. అయితే చనిపోయిన వారిలో మూడింట రెండు వంతుల మంది మహిళలు, పిల్లలు ఉన్నారని పేర్కొంది.
అక్టోబరు 7, 2023న హమాస్ నేతృత్వంలోని ఉగ్రవాదులు దక్షిణ ఇజ్రాయెల్‌పై దాడి చేశారని.. ఇందులో దాదాపు 1,200 మంది మరణించారని, 250 మందిని బందీలుగా పట్టుకున్నారు. దాదాపు 100 మంది బందీలు ఇంకా హమాస్ చెరలో ఉన్నట్లు అంచనా. హమాస్ దాడి తరువాత, ఇజ్రాయెల్ కూడా ప్రతీకారం తీర్చుకుంది. దీని కారణంగా యుద్ధం ప్రారంభమైంది. ఈ యుద్ధం కారణంగా గాజాలోని 2.3 మిలియన్ల మందిలో 80 శాతం మంది నిరాశ్రయులయ్యారు.
ఇది కూడా చదవండి: నేటి నుంచి రంజాన్ ఉపవాస దీక్షలు.. పాటించాల్సిన నియమాలేంటి?
