‘మిస్టర్‌ 360’ సూర్యకుమార్ యాదవ్ టీ20ల్లో చరిత్ర సృష్టించాడు. అంతర్జాతీయ టీ20ల్లో అత్యంత తక్కువ బంతుల్లో రెండు వేల పరుగులు చేసిన తొలి బ్యాటర్‌గా రికార్డు నెలకొల్పాడు. కేవలం 1163 బంతుల్లో సూర్య ఈ ఫీట్ అందుకున్నాడు. మూడు టీ20ల సిరీస్‌లో భాగంగా దక్షిణాఫ్రికాతో జరుగుతున్న రెండో మ్యాచ్‌లో మిస్టర్‌ 360 ఈ ఘనత అందుకున్నాడు. లిజాడ్ విలియమ్స్ వేసిన ఐదో ఓవర్‌ నాలుగో బంతిని సింగిల్ తీసిన సూర్యకుమార్ టీ20ల్లో 2000 పరుగులు పూర్తి చేశాడు.
Read Also: ఓటీటీలోకి వచ్చేసిన కార్తి ‘జపాన్’
సూర్యకుమార్ యాదవ్ 56 ఇన్నింగ్స్‌ల్లో 2000 పరుగులు పూర్తి చేసి.. రికార్డుల రారాజు విరాట్ కోహ్లీ రికార్డును సమం చేశాడు. విరాట్ కూడా 56 ఇన్నింగ్స్‌ల్లోనే 2000 పరుగులు చేశాడు. ఈ జాబితాలో పాకిస్థాన్ బ్యాటర్ బాబర్ ఆజామ్ అగ్రస్థానంలో ఉన్నాడు. బాబర్ 52 ఇన్నింగ్స్‌ల్లో 2000 పరుగులు బాదాడు. మహమ్మద్ రిజ్వాన్ కూడా 52 ఇన్నింగ్స్‌ల్లోనే ఈ ఫీట్ అందుకున్నాడు. కాగా.. అంతర్జాతీయ టీ20ల్లో అత్యధిక పరుగులు చేసిన భారత బ్యాటర్ల జాబితాలో సూర్యకుమార్ యాదవ్ నాలుగో స్థానంలో ఉన్నాడు. సూర్య 59 ఇన్నింగ్స్‌ల్లో 2,041 రన్స్ చేశాడు. ఈ జాబితాలో విరాట్ కోహ్లీ టాప్‌లో ఉన్నాడు. విరాట్ 107 ఇన్నింగ్స్‌ల్లో 4008 రన్స్ చేశాడు. టీమిండియా కెప్టెన్ రోహిత్ శర్మ 140 ఇన్నింగ్స్‌ల్లో 3853 రన్స్ చేయగా.. లోకేష్ రాహుల్ 68 ఇన్నింగ్స్‌ల్లో 2256 పరుగులు బాదాడు.
